ម៉ាឡេស៊ី៖ ប្រទេសម៉ាឡេស៊ី នឹងបន្តប្រកាសវិធានការបិទខ្ទប់ (Lockdown) ក្នុងក្របខណ្ឌទូទាំងប្រទេសបន្តទៀត ដោយចាប់ផ្តើមពីថ្ងៃទី២៨ ខែមិថុនា ឆ្នាំ២០២១ នេះ ដើម្បីគ្រប់គ្រងស្ថានការណ៍រាលដាលកូវីដ-១៩ក្នុងប្រទេស ខណៈចំនួនអ្នកឆ្លងនៅតែបន្តកើនឡើងខ្ពស់ពីមួយថ្ងៃទៅមួយថ្ងៃ ស្របពេលដែលឱសានវាទនៃការប្រកាសបញ្ចប់បិទខ្ទប់ចូលមកដល់នៅថ្ងៃចន្ទនេះ។ 

ភ្នាក់ងារសារព័ត៌មានរបស់រដ្ឋ Bernama បានចេញផ្សាយនៅថ្ងៃអាទិត្យម្សិលមិញនេះថា នាយករដ្ឋមន្រ្តីម៉ាឡេស៊ី លោក Muhyiddin Yassin ប្រកាសថា វិធានការបិទខ្ទប់នៅក្នុងប្រទេសម៉ាឡេស៊ីនឹងនៅតែបន្តអនុវត្ត ដរាបណាចំនួនអ្នកឆ្លងនៅតែខ្ពស់ជាងចំនួន ៤,០០០នាក់ក្នុងមួយថ្ងៃ។

មន្រ្តីជាន់ខ្ពស់ក្រសួងការពារជាតិ លោក Ismail Sabri Yaakob បានបញ្ជាក់ឱ្យដឹងថា វិធានការបិទខ្ទប់របស់រដ្ឋាភិបាលម៉ាឡេស៊ីនៅតែបន្តអនុវត្ត រហូតដល់មានការសម្រេចបាននូវចំនុចសំខាន់ៗចំនួន ៣ រួមមាន ទី១ ចំនួនអ្នកឆ្លងថ្មីធ្លាក់ចុះមកក្រោម ៤,០០០នាក់ក្នុងមួយថ្ងៃ ទី២ អត្រាអ្នកសម្រាកព្យាបាលក្នុងស្ថានភាពធ្ងន់ធ្ងរមានចំនួនតិចអាចគ្រប់គ្រងបាន និងទី៣ ប្រជាជន ១០ភាគរយនៃចំនួនប្រជាជនសរុបបានទទួលវ៉ាក់សាំងដូសទី២រួចរាល់។

គួរបញ្ជាក់ថា សម្រាប់ចំនួនអត្រាឆ្លងថ្មីនៅក្នុងប្រទេសម៉ាឡេស៊ី នៅតែមានអត្រាខ្ពស់នៅឡើយ ពោលគឺករណីវិជ្ជមានថ្មីកាលពីថ្ងៃសៅរ៍មានចំនួន ៥,៨០៣ករណី៕